Atentado ao Idioma e liberdade na Galiza

O actual governo da Junta da Galiza, «devolvendo o favor e atendendo às petiçons dos colectivos galegófobos» segundo alguns analistas, implantará umha nova medida contra a utilizaçom do galego no ensino, possibilitando a limitaçom do seu uso até em só duas disciplinas.

Segundo informa o periódico digital Vieiros.com, a Conselharia da Educaçom está a trabalhar no novo decreto de línguas para o ensino nom universitário.

O decreto tenciona regulamentar a língua de quatro disciplinas, deixando 'livre eleiçom' para as restantes. Esta decisom depende dos conselhos escolares, que deveram escolher em votaçom a língua veicular das matérias, com a excepçom das Línguas Galega e Castelhana, Ciências Sociais (em galego) e Matemática (em castelhano).

Por enquanto desconhece-se qual é o critério para a escolha de matemática em castelhano (umha disciplina que conta com mais horas semanais do que as ciências sociais), se bem nom falta quem veja nos preconceitos e na ignorância a respeito da utilidade das línguas a resposta, tal como têm assinalado as principais organizaçons sindicais da Galiza e associaçons de pais e maes.

Eliminada a nunca cumprida igualdade de 50% para cada língua no ensino, o castelhano poderá reafirmar-se novamente como língua privilegiada na Galiza.

Ligado com esta notícia, do movimento normalizador incide-se na incompetência no nosso idioma dumha grande parte do professorado galego por diversas razons, o que é mais um sintoma de que o castelhano será a eleiçom maioritária nos centros do País.

fonte: www.pglingua.org
foto: Mural em Ribadeu em defesa do idioma